Wales Cymru

Rydym ni'n gweld ac yn gwneud pethau mewn ffordd wahanol yma yng Nghymru. Nid ydym yn cuddio y tu ôl i ystrydebau a marchnata mewn ffordd ffug. Rydym ni'n gwerthfawrogi ein ffordd o fyw a'r ffordd yr ydym ni'n gweithredu. Dylem ni ddweud wrth bobl am hynny, yn ein ffordd unigryw. Felly, os ydych yn siarad am golff, gwnewch hynny yn null Cymru. Wedi'r cyfan, mae'n fwy o hwyl denu pobl drwy ddweud wrthynt nad oes rhaid iddynt fod yn gyfoethog, nad oes rhaid iddynt fod yn ddynion, ac yn sicr nad oes rhaid iddynt wisgo trowseri fel Rupert the Bear.

Oes, mae gennym ni olygfeydd prydferth ac amgueddfeydd llawn treftadaeth yma yng Nghymru. Ond, mae gennym ni fwy na hynny. Rydym ni'n llawn pobl â syniadau unigryw, a phobl sy'n gweithredu. Pobl a chwmnïau sy'n gwneud i bethau ddigwydd yng Nghymru. Beth am adeilad Cynulliad Cenedlaethol Cymru, y Senedd. Roeddem ni'n meddwl y byddai'n beth gwych i'w adeiladu o ddeunyddiau cynaliadwy. Ond nid meddwl yn unig am y peth wnaethom ni. Dyna wnaethom ni. Mae hyrwyddo datblygu cynaliadwy yn rhan o'n cyfansoddiad hyd yn oed. Enghraifft arall o syniad unigryw.

Rydym ni i gyd yn ymwybodol o'r holl dulliau arferol o hyrwyddo: hysbysebion, post uniongyrchol, gwefannau. Maen nhw'n wych. Ond, ambell dro mae ffordd llai amlwg, mwy diddorol, a mwy perthnasol o drosglwyddo neges. Ydych chi'n siarad gyda dynion busnes rhyngwladol? Pam na wnewch chi ffilm yn cynnwys staff Busnes Rhyngwladol Cymru a'u cleientiaid, yn dod at ei gilydd i ddatrys pos enfawr. Wedyn, gallwch ei ddangos fel rhan o'r adloniant ar awyrenau 15 o gwmnïau hedfan gwahanol.